මානෙල් සහ ජීවන් නිවසට පැමිණෙද්දී මා සිටියේ මිදුලේ ලිපක් හදාගෙන කොස් ඇට බදිමිනි.කොස් ඇට වලින් සාදන අග්ගලා කෑමට තාරක මෙන්ම තාත්තාත් ප්‍රිය කළේය.කොස් ඇට ගලෙන් තලා,ලුණු සහ කෑලි මිරිස් දමා තෙම්පරාදු කර,පියන තද කර වැසිය හැකි බෝතලයක හෝ ටින් එකක දැමූ කල දින ගණනාවක් තබා ගත හැකි වූයේය.

''ෂිහ් මළ ජරාව..'' කියමින් සේපාලිකා අපහාස කළත් තාරක,එරන්දි සහ දීප්ති ඒවා බත්මුල්වලට බැඳ ගෙන ගියේ බොහෝ ආශාවෙනි.එම නිසාම ගහක් යට කොස් ඇට වැටී තිබුන හොත් තාත්තා ඒවා එකතු කර මට ගෙනැවිත් දුන්නේය.