මහාචාර්ය මයිකල් ගෝල්ඩ්මාන් විසින් රචනා කර ඇති The Imperial Nature කෘතිය එවන් පර්යේෂණ ග්‍රන්ථයකි.මේ සඳහා ඔහු විවිධ මට්ටමේ ලේඛන සිය ගණනක් ද විවිධ පුද්ගලයන් සමඟ කරන ලද සම්මුඛ සාකච්ඡා ද සහභාගීත්ව නිරීක්ෂණ ද භාවිතා කර ඇත.එමගින් ලෝක බැංකුව හුදෙක් ණය දෙන ආයතනයකට වඩා උතුරු-දකුණු දේශපාලනික බල ගතිකත්වයන් විනිවිදින ආයතනයක්  කටයුතු කරන ආකාරය පැහැදිලි කෙරේ.ලෝක බැංකුව ඒ සඳහා වන දැනුම නිපදවන ආකාරය ද එම දැනුම ලොව පුරා බෙදා හරින ආකාරය ද අවසානයේ එය හෙජමොනියක් බවට පත් කරන ආකාරය ද සාධක සහිතව මෙමගින් ඉදිරිපත් කෙරේ.එහෙයින් ම මෙය ශ්‍රී ලංකාව වැනි රටවල දේශපාලන හැඩගැන්වීම් තේරුම් ගැනීමට මහඟු ආධාරකයක් වනු නියතය.