නර්තන හා වාදන ඇඳුම් ආයිත්තම් වල පෞරාණික තත්වයන් සොයා යාමේ දී 18-19 සියවස් අතර නිර්මාණය වී ඇති පහතරට පළාතේ විහාර බිතුසිතුවම් වලින් සොයාගත හැකි සාධකයන් අපමණය.බුද්ධ චරිතයේ ඇතැම් අවස්ථාවන් හා ජාතක කතා ආදියේ දී හමුවන පෙරහර අවස්ථා පිළිබඳව විමර්ශනය කිරීමේ දී ආදි කාලීන රංග වස්ත්‍රාභරණ හා වාදන ඇඳුම් ආයිත්තම් ගැන තොරතුරු රැසක් හෙළිදරව් කර ගත හැකි අතර ඇතැම් රංග වස්ත්‍ර වර්තමානයේ පවතින ආකාරයට ම දැක ගත හැකි වීම සුවිශේෂී වෙයි.

දේශීය සම්ප්‍රදායික නර්තන ශෛලීන් ලෙස ගැනෙන උඩරට නර්තනය,පහතරට නර්තනය හා සබරගමු නර්තනය ඇතුළත් වන ශාන්තිකර්ම, කෝලම්, සොකරි ගැමි නර්තනය ආදියේ භාවිත රංග වස්ත්‍රාභරණ මෙන්ම වෙස් ගැන්වීම් මෙහි දී විමර්ශනයට ලක් කර ඇති අතර,සමීපතම අසල්වැසි රාජ්‍යය වූ භාරතයේ ව්‍යාප්තව පවතින භාරත නාට්‍යයම්,කථක්,කථකලි,මණිපුරි,ඔඩ්ඩිස්සි,කුච්චිපුඩි,ජාව් යන නර්තන ශෛලීන්ගේ භාවිත ඇඳුම් ආයිත්තම් සහ වෙස් ගැන්වීම් කෙරෙහි ද ප්‍රාමාණික අවබෝධයක් විෂයේ නිරත විධ්‍යාර්ථින් ඇතුළු සමස්ථ පාඨකයා වෙත ලබා දීමට මෙම කෘතියෙන් අවකාශ සැලසෙනු ඇත.