2020 ගොඩගේ අත්පිටපත් තරගයේ අවසන් වටය සදහා නිර්දේශිත පොතකි. හූවක පමණ දුරක් ගං දියේ ගිය තැන ඇයට බල්ලන්ගේ ඝෝෂාවත් අශ්වයන්ගේ කුර ගැටෙන හඬත් සවන්පත් මායිමේ ඇසෙන්න විය. ඈ උන් තැනම පහත් වී උණ පඳුරකට මුවා වී බලන්න වූවා ය. ඇයව අලාගන්න බලු රැළක් එක්ක හමුදා සෙබළු දහ පහළොවකින් යුත් නඩයක් පැමිණ ඇති අයුරු ඇයට දැකගත හැකි විය. වියරු වෙසින් ගොදුර සොයා එක පිම්මට දිව ආ බල්ලෝ සිරිමලී ගඟට බැස්ස තැන නැවතුණහ. ඒත් උන්ට තම ගොදුර අතහැරී තිබුණි. බල්ලන්ගේ වියරු බිරුම නැවතී තිබූ අතර ඇත්තේ උන්ගේ මුවෙන් පිටවෙන දුක්ගැනවිල්ලයි