ගැහැණු,ස්වභාවයෙන්ම වෙනස්වීම තේරුම් නොගනිති.
බාහිර පරිසරය කෙරෙහි එතරම් විශ්වාසයක් නොතබයි.
මිනිසා තුල ඇති උද්දාමය හා පලා යෑමේ කැමැත්ත පාලනය කොට ශාන්ත බවට හා සංයත බවට පත්කොට ඔහුව ගෘහ ජීවිතයට ඇද බැඳ තබා ගැනීම ස්ත්‍රිය තුල සහජයෙන් ම පිහිටන ගුණයකි.
ඔවුන් තුල ඇති මාධූර්යය,ස්නේහය හා ප්‍රේමය දැක්වීමේ නිපුණතාව මේ ගුණය තුල පිහිටයි.

එම ගුණය කෙතරම් බලවත් ද කිව හොත් ඊට විරුද්ධව නැගී සිට ජය ගැනීම කල හැක්කේ ටික දෙනෙකුට පමණි.

විභූතිභූෂණ බන්ද්‍යොපාධ්‍යායන්ගේ අපරාජිතෝ කෘතියෙහි එන අපු නම් චරිතයේ වැඩිමහල් අවධිය අපුගේ ලෝකය ලෙසින්, චින්තා ලක්‍ෂ්මී සිංහආරච්චි සිංහලට පරිවර්තනය කරයි. සිය මවගේ මරණින් පසු තනිව ජීවිතයට මුහුණ දෙන අපුගේ අනපේක්ෂිත විවාහයත්, ස්වාමි පුරුෂයකු, පියකු සහ මුහුකුරා ගිය මිනිසකු ලෙස අපු සමාජය සමග ගනු දෙනු කරනා ආකාරයත් මෙමගින් විදහා දැක්වේ. මනහර ලෙස රචනා වී ඇති මෙම කෘතියේ ඉතා ප්‍රේමාන්විත ලෙස, සජීවීව අපු සහ අපර්ණා ගේ ආදරය රචකයා සිතුවම් කරයි. ඒ අතරම කාජල්, අපූගේ කුඩා දරුවාගේ චරිතය තුලින් යලිත් වරක් සියුම් ලෙස අපගේ හදවතට ආමන්ත්‍රණය කරන රචකයා මුල සිට අග දක්වාම කෘතියේ ජීව ගුණය රැක ගනිමින් පාඨකයා ආකර්ෂණය කර තබා ගනියි.