රොන්ස්කි කලබල වී දුම්රිය දෙසට දිව ගියේ ය. ඔහු දුම්රිය මැදිරියකට ඇතුළු වන විටම සුන්දර කාන්තාවක් එහි සිට පිටතට එමින් සිටියා ය. දෙදෙනා එකිනෙකාගේ ඇගේ හැපී නොවැටි බේරුණි.

"ඔහ්! අයිම් වෙරි සොරි" රොන්ස්කි ඇයගෙන් සමාව අයැද සිටිමින්ම ඈ අල්ලා ගත්තේ ය.
"ඕ... නොට්ටු වොරි..."
ඇය සිනාසෙමින් කීවාය. එක්වරක් දුටු කෙනෙකුට නැවත හැරී බලන්නට සිත් දෙන තරමට ආකර්ෂණීය බවක් ඈ තුළ විය. දෙදෙනාට දෙදෙනා මුහුණලා සිටගෙන, ගෙවී ගිය කෙටි කාල පරාසය ඇතුළත කිසියම් අමුත්තක් සිදුවිය. මනාව සකසා තිබුණු ඇගේ ඇහිබැම හා තද කළු පැහැති ඇහි පිහාටු අතරින් විහිදුණු කැල්මෙන් රොන්ස්කි වසග වූ සෙයකි. රතු පැහැති දෙතොල් අතරින් තුනී සිනාවක් පාමින් ඈ පසෙකට වූවාය. කිසිවෙකුට වත් නොහැගි, ඔවුන් දෙදෙනාටම පමණක් හැගි, එක් නිමේෂයක් තුළ ඇති වූ සුන්දර මිහිරි තම මතකය සදානුස්මරණිය විය. ආචාරශීලී ලෙස ඔහු ද පසෙකට විය. බැලු බැල්මටම ඇය වංශවත් කුල කාන්තාවක බව රොන්ස්කිට වැටහිණි.

ඇනා කැරණිනා’ යනු රුසියන් ජාතික Leo Tolstoy කතුවරයා විසින් රචිත ‘Anna Karenina’ නම් කෘතියේ සිංහල පරිවර්තනයයි.
ඔහු මෙම කෘතියෙන් දක්වා ඇත්තේ මෙහි ප‍්‍රධාන චරිතය වන ‘ඇනා’ නම් වූ චරිතයෙහි ජීවිත කතාවයි. එහිදී ඇය කෙතරම් උසස් චරිතයක් වුවද ඇයට වඩා පහත් කුලයෙහි අයගෙන් අවලාද ඇසීමෙහි දී ඈන්ගේ චරිතයෙන් එම අවස්ථාවෙහිදී පෙන්නුම් කරනු ලබන්නේ ඉවසිලිවන්ත ගුණයෙහි ප‍්‍රගුණතාවයයි. ඇගේ ස්වාමියා සමග දික්කසාද වීමත්, ඇය බලාපොරොත්තු වන දික්කසාදය ඇයට නොලැබීබමත් මෙහි අන්තර්ගත වේ. තමාගේ ස්වාමියා හා දරුවා අතහැර රොන්සින් නමැති පුරුෂයා වෙත යාමෙන් එහි දී ඇයට අත්විඳීමට ලැබෙන අත්දැකීම් හා ජීවිතයත් ජීවිතයේ වන අසරණකම් අතරත් දෝලනය වන ආකාරයත් මෙහිදී ඇතුළත් කොට ඇත. ඇගේ ජීවිතයේ අවසානය සිය දිවි හානි කර ගැනීමක් බවට පත් වීමද තවත් බලාපොරොත්තු නොවූ සිදුවීමකි. මේ ආකරයට ගලා යන සිදුවීම් රසවත් ආකාරයටත් කුතුහලය උපදවන ආකාරයටත් සිංහලයට පරිවර්තනය කර ඇත්තේ සෝමා ටී. පෙරේරා මහත්මිය විසිනි.