නිමිත්ත : කුසුමෙගේ සැමියා වැඩ කළේ ලී මෝලක ය.නොබෝදා මහ කියතට හසුව ඔහුගේ අත මැණික් කටුවෙන් වෙන් විය.

ගහට ගහක් මුණ ගැහෙනා මොරටුවට
ගැහැට මැදින් කොට ඇද්දා මෝලකට
වේලක් අතැර වේලක් හරි දුන් බඩට
දොසක් කියන්ඩ ද කැරකෙන කියතකට

රෑට බතට ලිප සරි කර තියල්ලා
පානු පැයෙන් ඉගිලුණි මගෙ කුරුල්ලා
වනේ දෙවි ගොල්ල රොස්වී හැවිල්ලා
අනේ පොක්කලං පිරි අත උගුල්ලා

සඳේ මුදු ගුණය හිස මත ගෙනාවා
අතේ රළු ඇඟිලි තුඩු වාසනාවා
තලේ මුවත රාහුට පෑහුනේයා
සෙනේ මැණික් කටුවෙන් වෑහුනේයා

කොටං ඇදපු මගෙ ඇත් රජු ලෙඩ ගානේ
ඕලු මුවන් දලු බුදිනව වන දහනේ
මාර කියත මදිමින් දත්තක් ගානේ
දාර වනය බිඳිනවමයි මේ කුසුමේ