"ආ, කොහොමද?" වයසක මිනිහා කතා කළේය.
ලොකු සිරුරක් ඇති නාකි බළලා යාන්තමට ඔළුව උස්සා, සෝමාරි කමට, පහත් හඬින් පිළිවදන් දුනි.
"ලස්සන කාලගුණයක්"
"හ්ම්." බළලා කීය.
"අහසේ වළා පොදක් නැහැ."
"...දැනට."
"ඒ කියන්නේ, පස්සේ නරක් වෙයිද?"
"හැන්දෑ වෙනකොට කළු කරයි වගේ" කළු බළලා හෙමිහිට පාදයක් දිග ඇරියේ ය. ඇස් පුංචි කළේ ය. මහලු මිනිසා දෙස දිගු බැල්මක් හෙළුවේ ය. මුහුණේ කොහොමත් විරිත්තිල්ලක් ඇති මිනිහා ද ඌ දෙස පෙරළා බැලීය. මොහොතක දෙගිඩියාවක සිටි බළලා ඊ ළඟට කතා කරන්නට විය.

"හ්ම්.. ඒ කියන්නේ ඔහේට කතා කරන්න පුළුවන්."
"ඒක හරි." මිනිහා කුළෑටිකමින් කී ය. බළලා වෙත ගෞරව පෑමට ඔහු සිය වැරහැලි කපු තොප්පිය ගලවා අතට ගත්තේය.
"හම්බවෙන හැම පූසෙක් එක්කම කතා කරන්න පුළුවන් කියනවා නෙවෙයි. ඒත්, වෙලාව හොඳ නම්, ඒ කියන්නේ දැන් වගේ, මට ඇහැකි කතා කරන්න."
"හරි ෂෝක්." ගානකට නැතුව බළලා කී ය.

පිටු 715 ක් පුරාවට ගලා යන කෆ්කා මුහුදු වෙරළේ කෘතියෙන් දිග හැරෙන්නේ අපුර්ව චරිත දෙකක අසාමාන්‍ය කතාන්දරයයි..තම පියාගේ අනිටු අනාවැකියක බියකරු සෙවනැල්ල මැද " කෆ්කා තමුරා " වයස අවුරුදු 15 දී ගෙදරින් පලා යයි..ළමා වියේ ඇතිවූ රුදුරු කම්පනයක බිල්ලක් වන මහලු " නකතා "සිය සරල දිවිය හිටිහැටියේ උඩු යටිකුරු කරගනී..මොවුන් දෙදෙනාගේ සමගාමී ත්‍රාසජනක දිගු ගමන තවත් විශේෂ චරිත සහ සිදුවීම්වලින් සරු වන හැටි අපුරු ය..පික්නික් ගිය සිසුන් 16 දෙනා සිහිමුර්ජා වූ බත් පාත්තර කන්දේ සිද්ධිය,බළලුන් සමග කතා කරන ඒත් අකුරු ලියන්න නොදන්නා නකතා,පැය 30-40 එක දිගට නිදාගන්නා නකතා,අහසින් මාළු,කුඩැල්ලන් වැසි වස්සන නකතා,නිවසින් පලා යන කෆ්කාට උදව්වට එන නිර්ලිංගික ඔෂිමා,කෆ්කාගේ නවාතැන නකමුරා පුස්ථකාලය,පුස්ථාකාලයේ අධිපතිනිය මිස් සෙයිකි,සුප්‍රකට බළල් ඝාතක ජොනී වෝකර්(whiskey),නකතාගේ ගමනට සහය වන ට්‍රක්‌ ඩ්‍රයිවර් හොෂිනෝ,පිවිසුම් ගල සොයාගැනීමට හොෂිනෝට උදව්වට එන කර්නල් සැන්ඩර්ස් (KFC),බුද්ධිමත් සියම් බැළලිය "මමී",දෙවන ලෝක යුද්ධයේ සිට වයසට නොගිය හේවායන් දෙදෙනෙක් ඒ සියල්ල අතරේ දාමරික මිනිස් ඝාතනයක් - එහෙත් මිනීමරුවා සේම ඔහුගේ බිල්ලත්,නොවිසදුන ප්‍රහේළිකාවක්.